Voto por correo desde España

A XEC ampliou o prazo para depositar o voto por correo ata o 7 de xuño, para todos os electores que estean en España e nos horarios habituais das oficinas de Correos e como máximo ata as 14 horas.

Unha vez convocadas as eleccións e ata o día 30 de maio, data na que finaliza o prazo para solicitar o voto por correo, poderase acudir a calquera Oficina de Correos e solicitar o impreso para votar por correo, ou presentar a solicitude electrónica do voto por correo.

Solicitude electrónica

Para presentar a solicitude de voto electrónico por correo, pediráselle:

Certificado dixital(Abrirase unha nova xanela) ou DNI electrónico(Abrirase unha nova xanela), e Autofirma(Abrirase unha nova xanela) (ter instalada a aplicación).

Recoméndase utilizar unha versión de Chrome, Firefox ou Safari de entre as requiridas por Autofirma, segundo o seu sistema operativo (consulte a documentación de instalación que se descarga con Autofirma).

Certificados (Abrirase unha nova xanela) que son aceptados.

Solicitude presencial:

Nas Oficinas de Correos, solicitando o impreso para votar, ou descargándoo desde esta páxina. Unha vez cuberto, entregarase persoalmente en calquera Oficina de Correos, acreditando a súa identificación perante a persoa da Oficina, que así llo requirirá para verificar a súa sinatura, presentando o seu DNI, pasaporte ou carné de conducir (xa que inclúen fotografía do titular e sinatura; en ningún caso fotocopia), “é posible que a identidade do votante estranxeiro sexa acreditada mediante a presentación dun documento oficial expedido polas autoridades españolas ou do Estado de orixe que inclúa a sinatura e a foto do elector e que acredita a súa identidade” (Acordo XEC 7 de abril de 2011).

O prazo para poder solicitar o voto por correo finaliza o vindeiro día 30 de maio.

Seguintes pasos comúns á solicitude electrónica e presencial:

Os servizos de Correos remiten a solicitude debidamente cuberta á Oficina do Censo Electoral, que fai a anotación correspondente nas listas do censo. Xa que logo, a persoa que solicita o voto por correo, quer de forma electrónica quer presencial, unha vez foi admitida a súa solicitude, XA NON PODE VOTAR PERSOALMENTE.

A continuación a Oficina do Censo Electoral envía por correo certificado ao domicilio indicado no impreso de solicitude un sobre coa seguinte documentación:

  • Papeletas e sobre de votación.
  • O certificado de inscrición no censo.
  • Un sobre no que figurará o enderezo da Mesa onde lle correspondería votar.
  • Unha folla explicativa.

Esta documentación debe ser recibida pola persoa que o solicitou, previa acreditación da súa identidade. Se non estivese no seu domicilio, terá que ir persoalmente a recollela á Oficina de Correos correspondente.

O elector ou a electora deberá seleccionar a súa opción de voto, que introducirá no sobre de votación e despois pecharao. Incluirá o sobre de votación e o certificado de inscrición no censo no sobre dirixido á Mesa e remitirao por correo certificado, en todo caso como moi tarde o 5 de xuño. Este envío é gratuíto, xa que será o Ministerio do Interior, a través do orzamento electoral, o que se fará cargo de compensar ao operador postal por estes envíos.

O elector ou a electora que vaia depositar o seu voto deberá entregar persoalmente a documentación para votar, identificándose mediante DNI, pasaporte ou outro documento identificativo (Instrución 5/2023 da XEC)(Abrirase unha nova xanela).

Se o elector ou a electora non puidese entregar o seu voto persoalmente, deberá solicitar unha autorización, asinada polo propio elector ou electora, para que outra persoa poida facer a entrega no seu nome. Deberá ir acompañada de fotocopia do seu DNI, pasaporte ou outro documento oficial identificativo.

O Servizo de Correos conservará ata o día da votación toda a correspondencia dirixida ás Mesas electorais e trasladaraa a ditas Mesas ás nove da mañá. Así mesmo, seguirá dando traslado da que poida recibirse en dito día, ata as vinte horas do mesmo. O Servizo de Correos levará un rexistro de toda a documentación recibida, que estará a disposición das Xuntas Electorais.

Os sobres recibidos despois das vinte horas do día fixado para a votación remitiranse á Xunta Electoral de Zona (e destruiranse).

O 9 de xuño, ás 20 horas, despois de votar a derradeira persoa na Mesa electoral, introduciranse na urna respectiva os sobres que conteñan as papeletas do voto remitidas por correo.

Para isto, séguense os seguintes pasos:

  • Abrir, un por un, os sobres remitidos á Presidencia da Mesa e comprobar que conteñen o certificado de inscrición no censo e o sobre ou sobres do voto por correo.
  • Comprobar que estea inscrito ou inscrita no censo da Mesa.
  • Introducir na urna correspondente o sobre de votación.
  • Anotar o elector ou a electora na listaxe numerada de votantes (os e as vogais realizan a anotación)